"ಕರುನಾಡಿನಿಂದ ಕತಾರ್‌ವರೆಗೆ ಕನ್ನಡದ ಕಂಪು: ಕನ್ನಡಿಗರ ಒಗ್ಗಟ್ಟಿಗೆ ಉಮಾಶ್ರೀ ಮೆಚ್ಚುಗೆ"

"ಕರುನಾಡಿನಿಂದ ಕತಾರ್‌ವರೆಗೆ ಕನ್ನಡದ ಕಂಪು: ಕನ್ನಡಿಗರ ಒಗ್ಗಟ್ಟಿಗೆ ಉಮಾಶ್ರೀ ಮೆಚ್ಚುಗೆ"

"ಕರುನಾಡಿನಿಂದ ಕತಾರ್‌ವರೆಗೆ ಕನ್ನಡದ ಕಂಪು: ಕನ್ನಡಿಗರ ಒಗ್ಗಟ್ಟಿಗೆ ಉಮಾಶ್ರೀ ಮೆಚ್ಚುಗೆ"

#QatarKarnatakaSangha #KarunadaVaibhava2026 #KarnatakaRajyotsava #DrUmasri #QatarKannadaSamman #KannadaPride #KannadaCulture #KannadigasAbroad #KannadaLanguage #NammaKannada #DohaQatar #KannadaCommunity #OverseasKannadigas #CulturalFestival #KarnatakaHeritage #KannadaUnity #KannadaLove #RajyotsavaCelebration #KannadaBelagu #GlobalKannadigas

ದೋಹಾ (ಕತಾರ್): ಪರದೇಶದಲ್ಲಿದ್ದರೂ ಕನ್ನಡದ ಮಣ್ಣಿನ ಜೊತೆಗಿನ ನಂಟನ್ನು ಜೀವಂತವಾಗಿಟ್ಟುಕೊಂಡಿರುವ ಕತಾರ್ ಕನ್ನಡಿಗರ ಕನ್ನಡಾಭಿಮಾನವನ್ನು ಕರ್ನಾಟಕ ವಿಧಾನಪರಿಷತ್ತಿನ ಉಪಸಭಾಪತಿಗಳು ಹಾಗೂ ಹಿರಿಯ ಕಲಾವಿದೆ ಡಾ. ಉಮಾಶ್ರೀ ಅವರು ಶ್ಲಾಘಿಸಿದರು. ಕತಾರ್ ಕರ್ನಾಟಕ ಸಂಘ ಆಯೋಜಿಸಿದ್ದ 71ನೇ ಕರ್ನಾಟಕ ರಾಜ್ಯೋತ್ಸವ ಸಂಭ್ರಮ ‘ಕರುನಾಡ ವೈಭವ-2026’ ಕಾರ್ಯಕ್ರಮದಲ್ಲಿ ಪ್ರತಿಷ್ಠಿತ ‘ಕತಾರ್ ಕನ್ನಡ ಸಮ್ಮಾನ್’ ಪ್ರಶಸ್ತಿ ಸ್ವೀಕರಿಸಿದ ಬಳಿಕ ಮಾತನಾಡಿದ ಅವರು, ಕನ್ನಡಿಗರು ಎಲ್ಲೇ ವಾಸಿಸುತ್ತಿದ್ದರೂ ತಮ್ಮ ಭಾಷೆ, ಸಂಸ್ಕೃತಿ ಮತ್ತು ಪರಂಪರೆಯನ್ನು ಉಳಿಸಿಕೊಳ್ಳುವ ಮೂಲಕ ಕನ್ನಡದ ಬೆಳವಣಿಗೆಗೆ ಅಮೂಲ್ಯ ಕೊಡುಗೆ ನೀಡುತ್ತಿದ್ದಾರೆ ಎಂದು ಹೇಳಿದರು.

ಕತಾರ್‌ನಂತಹ ದೂರದ ದೇಶದಲ್ಲಿ ನೆಲೆಸಿದ್ದರೂ ಕನ್ನಡದ ಮನಸ್ಸು, ಕನ್ನಡದ ಪ್ರೀತಿ ಮತ್ತು ಕನ್ನಡದ ಸಂಸ್ಕೃತಿಯನ್ನು ಉಳಿಸಿಕೊಂಡು ಬಂದಿರುವುದು ನಿಜವಾದ ದೇಶಪ್ರೇಮದ ಸಂಕೇತವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು. “ನೀವು ಎಲ್ಲಿದ್ದರೂ ಕನ್ನಡ ನಿಮ್ಮೊಳಗೆ ಬದುಕುತ್ತಿದೆ. ನೀವು ಇರುವವರೆಗೂ ಕನ್ನಡ ಎಂದಿಗೂ ಸಾಯುವುದಿಲ್ಲ. ಕನ್ನಡ ಉಳಿಯುತ್ತದೆ, ಕನ್ನಡ ಬೆಳೆಯುತ್ತದೆ. ಕನ್ನಡದ ಮೇಲಿನ ಈ ಅಭಿಮಾನ ಮತ್ತು ಬದ್ಧತೆ ಮುಂದಿನ ಪೀಳಿಗೆಗೂ ಮಾದರಿಯಾಗಬೇಕು” ಎಂದು ಹೇಳಿದರು.

‘ಕರುನಾಡ ವೈಭವ-2026’ ಕಾರ್ಯಕ್ರಮವು ಕೇವಲ ರಾಜ್ಯೋತ್ಸವ ಆಚರಣೆಯಲ್ಲ, ಬದಲಾಗಿ ವಿಶ್ವದಾದ್ಯಂತ ಹರಡಿರುವ ಕನ್ನಡಿಗರ ಮನಸ್ಸುಗಳನ್ನು ಒಂದೆಡೆ ಸೇರಿಸುವ ಸಾಂಸ್ಕೃತಿಕ ಸೇತುವೆಯಾಗಿದೆ ಎಂದು ಉಮಾಶ್ರೀ ಹೇಳಿದರು. ಕತಾರ್ ಕರ್ನಾಟಕ ಸಂಘ ಕನ್ನಡ ತಾಯಿ ಭುವನೇಶ್ವರಿಯನ್ನು ಸ್ಮರಿಸುವ ಮೂಲಕ ಕನ್ನಡಿಗರನ್ನೆಲ್ಲ ಒಗ್ಗೂಡಿಸಿ, ಹಾಸ್ಯ, ಸಂಗೀತ ಮತ್ತು ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೂಲಕ ಕನ್ನಡದ ಸಂಸ್ಕೃತಿಯನ್ನು ಉಳಿಸಿ ಬೆಳೆಸುತ್ತಿರುವುದು ನಿಜಕ್ಕೂ ಶ್ಲಾಘನೀಯ ಕಾರ್ಯ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.

ತಮಗೆ ದೊರೆತಿರುವ ‘ಕತಾರ್ ಕನ್ನಡ ಸಮ್ಮಾನ್’ ಪ್ರಶಸ್ತಿಯನ್ನು ಸ್ವೀಕರಿಸುತ್ತಾ ಭಾವುಕರಾದ ಉಮಾಶ್ರೀ, ಈ ಗೌರವ ಕೇವಲ ತಮ್ಮ ವೈಯಕ್ತಿಕ ಸಾಧನೆಗೆ ಸೀಮಿತವಲ್ಲ ಎಂದು ಹೇಳಿದರು. “ನಾನು ಜೀವನದಲ್ಲಿ ಏನಾದರೂ ಸಾಧಿಸಿದ್ದರೆ, ಅದರ ಹಿಂದೆ ರಾಜ್ಯದ ಜನರು, ಅಭಿಮಾನಿಗಳು, ಪ್ರೇಕ್ಷಕರು, ಮತದಾರರು ಹಾಗೂ ನನ್ನ ಕುಟುಂಬ ಸದಸ್ಯರ ಆಶೀರ್ವಾದ ಮತ್ತು ಬೆಂಬಲವಿದೆ. ಕಲಾವಿದೆಯಾಗಿ ಮತ್ತು ರಾಜಕಾರಣಿಯಾಗಿ ಬೆಳೆಯಲು ಜನರ ಪ್ರೋತ್ಸಾಹವೇ ನನ್ನ ಶಕ್ತಿ. ಆದ್ದರಿಂದ ಈ ಸನ್ಮಾನದ ಶ್ರೇಷ್ಠತೆಯೂ ನಿಮಗೆಲ್ಲರಿಗೂ ಸಲ್ಲಬೇಕು” ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಕತಾರ್ ಕನ್ನಡಿಗರ ಕನ್ನಡಾಭಿಮಾನವನ್ನು ವಿಶೇಷವಾಗಿ ಉಲ್ಲೇಖಿಸಿದ ಅವರು, ಮಕ್ಕಳಿಗೆ ಕನ್ನಡ ಕಲಿಸುವ ಪ್ರಯತ್ನ ಅತ್ಯಂತ ಮಹತ್ವದ್ದಾಗಿದೆ ಎಂದರು. “ಕರ್ನಾಟಕದಲ್ಲೇ ಕನ್ನಡದ ಬಗ್ಗೆ ಆಸಕ್ತಿ ಕಡಿಮೆಯಾಗುತ್ತಿರುವ ಈ ಕಾಲದಲ್ಲಿ, ಸಾವಿರಾರು ಕಿಲೋಮೀಟರ್ ದೂರದ ಪರದೇಶದಲ್ಲಿ ಕನ್ನಡವನ್ನು ಉಳಿಸಲು ಮತ್ತು ಮುಂದಿನ ಪೀಳಿಗೆಗೆ ಕನ್ನಡ ಕಲಿಸಲು ನೀವು ಮಾಡುತ್ತಿರುವ ಪ್ರಯತ್ನ ಅಸಾಧಾರಣವಾಗಿದೆ. ಇದು ಸಾಮಾನ್ಯ ಕೆಲಸವಲ್ಲ. ಕನ್ನಡದ ಮೇಲಿನ ನಿಮ್ಮ ಬದ್ಧತೆ ಎಲ್ಲ ಕನ್ನಡಿಗರೂ ಹೆಮ್ಮೆಪಡುವಂತಹದ್ದು” ಎಂದು ಹೇಳಿದರು.

ಪರದೇಶದಲ್ಲಿ ನೆಲೆಸಿರುವ ಕನ್ನಡಿಗರ ಬದುಕಿನ ಕುರಿತು ಮಾತನಾಡಿದ ಉಮಾಶ್ರೀ, ತಮ್ಮ ಬಂಧುಬಳಗ, ನೆಲ-ಜಲ ಮತ್ತು ತಾಯ್ನಾಡನ್ನು ಬಿಟ್ಟು ದೂರದ ದೇಶದಲ್ಲಿ ನೆಲೆಸಿ ಬದುಕನ್ನು ಕಟ್ಟಿಕೊಳ್ಳುವುದು ಸುಲಭದ ವಿಷಯವಲ್ಲ ಎಂದು ಹೇಳಿದರು. “ನೀವು ಕತಾರ್‌ನಂತಹ ದೇಶದಲ್ಲಿ ಇಲ್ಲಿ ಇರುವ ನಿಯಮಗಳನ್ನು ಪಾಲಿಸಿಕೊಂಡು ಸಂತೋಷದಿಂದ ಬದುಕನ್ನು ನಿರ್ವಹಿಸುತ್ತಿದ್ದೀರಿ. ನಿಮ್ಮೊಂದಿಗೆ ಕುಟುಂಬಗಳನ್ನು ಕರೆತಂದು, ಹೊಸ ವಾತಾವರಣದಲ್ಲಿ ಜೀವನ ರೂಪಿಸಿಕೊಂಡಿದ್ದೀರಿ. ಇದು ಒಂದು ದೊಡ್ಡ ಸಾಧನೆಯೇ ಸರಿ. ಇಷ್ಟು ದೂರದ ನಾಡಿನಲ್ಲಿ ಬದುಕು ಕಟ್ಟಿಕೊಳ್ಳುವುದು ಸುಲಭದ ಮಾತಲ್ಲ” ಎಂದು ಹೇಳಿದರು.

ಅದೇ ವೇಳೆ, ಕರ್ನಾಟಕದಲ್ಲೇ ಇದ್ದರೂ ಅನೇಕರು ನೆಮ್ಮದಿಯ ಬದುಕಿಗಾಗಿ ಹೋರಾಡಬೇಕಾಗುತ್ತದೆ. ಆದರೆ ಪರದೇಶದಲ್ಲಿ ಯಾವುದೇ ಹತ್ತಿರದ ಬಂಧುಗಳ ನೆರವಿಲ್ಲದೆ ಕನ್ನಡಿಗರು ಒಬ್ಬರಿಗೊಬ್ಬರು ಬಂಧುಗಳಾಗಿ, ಸಹಕಾರಿಗಳಾಗಿ ಬದುಕನ್ನು ಸಾಗಿಸುತ್ತಿರುವುದು ವಿಶಿಷ್ಟವಾದ ಸಂಗತಿ ಎಂದು ಅವರು ಬಣ್ಣಿಸಿದರು. “ಇಲ್ಲಿ ನಿಮಗೆ ನೀವೇ ಬಂಧುಗಳು. ನಿಮ್ಮ ಸುತ್ತಮುತ್ತ ಇರುವ ಕನ್ನಡಿಗರೇ ಕುಟುಂಬದ ಸದಸ್ಯರಂತೆ ಜೀವನದ ಪ್ರತಿಯೊಂದು ಹಂತದಲ್ಲೂ ಜೊತೆಯಾಗುತ್ತಿದ್ದಾರೆ. ಈ ಸಹಕಾರ ಮನೋಭಾವ, ಒಗ್ಗಟ್ಟು ಮತ್ತು ಬದುಕನ್ನು ಕಟ್ಟಿಕೊಳ್ಳುವ ಸಾಮರ್ಥ್ಯಕ್ಕೆ ನನ್ನದೊಂದು ಸಲಾಂ” ಎಂದು ಭಾವುಕರಾಗಿ ನುಡಿದರು.

ಕಾರ್ಯಕ್ರಮದಲ್ಲಿ ಖ್ಯಾತ ಹೃದ್ರೋಗ ತಜ್ಞ ಮತ್ತು ಸಂಸದ ಡಾ. ಸಿ.ಎನ್. ಮಂಜುನಾಥ್ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು. ಶಾಸಕ ಮೊಯಿನುದ್ದೀನ್ ಬಾವ, ಕತಾರ್ ಕರ್ನಾಟಕ ಸಂಘದ ಅಧ್ಯಕ್ಷ ಸುಬ್ರಹ್ಮಣ್ಯ, ಮಾಜಿ ಅಧ್ಯಕ್ಷ ರವಿ ಶೆಟ್ಟಿ, ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಕಾರ್ಯದರ್ಶಿ ಸಂತೋಷ್ ಹಾನಗಲ್, ಭಾರತೀಯ ರಾಯಭಾರ ಕಚೇರಿಯ ಆಶ್ರಯದಲ್ಲಿ ಕಾರ್ಯನಿರ್ವಹಿಸುವ ಭಾರತೀಯ ಸಾಂಸ್ಕೃತಿಕ ಕೇಂದ್ರದ ಅಧ್ಯಕ್ಷ ಮಣಿಕಂಠನ್ ಸೇರಿದಂತೆ ಕತಾರ್‌ನ ನೂರಾರು ಕನ್ನಡಿಗರು, ಉದ್ಯಮಿಗಳು, ಕಲಾವಿದರು ಮತ್ತು ಸಮಾಜಸೇವಕರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಕರ್ನಾಟಕದ ಖ್ಯಾತ ಕಲಾವಿದರಿಂದ ನಡೆದ ಹಾಸ್ಯ, ಸಂಗೀತ ಹಾಗೂ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ರಾಜ್ಯೋತ್ಸವ ಸಂಭ್ರಮಕ್ಕೆ ವಿಶೇಷ ಮೆರುಗು ನೀಡಿದವು. ಭಾರತೀಯ ರಾಯಭಾರ ಕಚೇರಿಯ ಆಶ್ರಯದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಭಾರತೀಯ ಸಾಂಸ್ಕೃತಿಕ ಕೇಂದ್ರದ ಅಂಗಸಂಸ್ಥೆಯಾದ ಕತಾರ್ ಕರ್ನಾಟಕ ಸಂಘವು ಆಯೋಜಿಸಿದ್ದ ಈ ಕಾರ್ಯಕ್ರಮ ಕನ್ನಡಿಗರ ಒಗ್ಗಟ್ಟು, ಸಂಸ್ಕೃತಿ ಮತ್ತು ಭಾಷೆಯ ಮೇಲಿನ ಪ್ರೀತಿಯನ್ನು ಅನಾವರಣಗೊಳಿಸುವ ಭವ್ಯ ವೇದಿಕೆಯಾಗಿತ್ತು.

ಕಾರ್ಯಕ್ರಮದ ಕೊನೆಯಲ್ಲಿ ಮಾತನಾಡಿದ ಡಾ. ಉಮಾಶ್ರೀ, “ನನ್ನಂತಹ ಒಬ್ಬ ಕಲಾವಿದೆಯನ್ನು ಮತ್ತು ಹೆಣ್ಣುಮಗಳನ್ನು ದೂರದ ನಾಡಿನಿಂದ ಆಹ್ವಾನಿಸಿ ಸನ್ಮಾನಿಸಿರುವ ಕತಾರ್ ಕರ್ನಾಟಕ ಸಂಘ ಹಾಗೂ ಅಲ್ಲಿನ ಎಲ್ಲ ಕನ್ನಡಿಗರಿಗೆ ನನ್ನ ಹೃದಯಪೂರ್ವಕ ಕೃತಜ್ಞತೆಗಳು. ಈ ಗೌರವವನ್ನು ನಾನು ಜೀವಮಾನವಿಡೀ ಸ್ಮರಿಸುತ್ತೇನೆ” ಎಂದು ಹೇಳಿ ಕತಾರ್ ಕನ್ನಡಿಗರಿಗೆ ಅಭಿನಂದನೆ ಸಲ್ಲಿಸಿದರು.