ಆಯುಷ್ ವೈದ್ಯರ ಬೇಡಿಕೆಗಳಿಗಾಗಿ ಸೆಪ್ಟೆಂಬರ್ 22ರಿಂದ ರಾಜ್ಯವ್ಯಾಪಿ ಅನಿರ್ದಿಷ್ಟಾವಧಿ ಮುಷ್ಕರಕ್ಕೆ AFI ಕರ್ನಾಟಕ ಕರೆ

ಆಯುಷ್ ವೈದ್ಯರ ಬೇಡಿಕೆಗಳಿಗಾಗಿ ಸೆಪ್ಟೆಂಬರ್ 22ರಿಂದ ರಾಜ್ಯವ್ಯಾಪಿ ಅನಿರ್ದಿಷ್ಟಾವಧಿ ಮುಷ್ಕರಕ್ಕೆ AFI ಕರ್ನಾಟಕ ಕರೆ

ಆಯುಷ್ ವೈದ್ಯರ ಬೇಡಿಕೆಗಳಿಗಾಗಿ ಸೆಪ್ಟೆಂಬರ್ 22ರಿಂದ ರಾಜ್ಯವ್ಯಾಪಿ ಅನಿರ್ದಿಷ್ಟಾವಧಿ ಮುಷ್ಕರಕ್ಕೆ AFI ಕರ್ನಾಟಕ ಕರೆ

ಬೆಂಗಳೂರು , ಸೆ.21-
ಆಯುಷ್ ಫೆಡರೇಷನ್ ಆಫ್ ಇಂಡಿಯಾ (AFI) ಕರ್ನಾಟಕ ರಾಜ್ಯ ಘಟಕವು ಆಯುಷ್ ವೈದ್ಯರ ಹಕ್ಕುಗಳು ಮತ್ತು ಬೇಡಿಕೆಗಳನ್ನು ಸರ್ಕಾರದ ಗಮನಕ್ಕೆ ತರುವ ಉದ್ದೇಶದಿಂದ ರಾಜ್ಯಾದ್ಯಂತದ ವೈದ್ಯರನ್ನು ಒಗ್ಗೂಡಿಸಿದೆ. ಸೆಪ್ಟೆಂಬರ್ 22ರಿಂದ ಅನಿರ್ದಿಷ್ಟಾವಧಿ ಮುಷ್ಕರ ಮತ್ತು ಧರಣಿ ಸತ್ಯಾಗ್ರಹ ನಡೆಸಲು ನಿರ್ಧಾರ ಕೈಗೊಳ್ಳಲಾಗಿದೆ. ಈ ಹೋರಾಟದಲ್ಲಿ ರಾಜ್ಯದ 32 ಜಿಲ್ಲೆಗಳ ಸಾವಿರಾರು ಆಯುಷ್ ವೈದ್ಯರು ಭಾಗವಹಿಸಲಿದ್ದು, 'ರಾಯಚೂರು ಚಲೋ' ಕಾರ್ಯಕ್ರಮದ ಮೂಲಕ ತಮ್ಮ ಧ್ವನಿಯನ್ನು ಸರ್ಕಾರದವರೆಗೆ ತಲುಪಿಸಲಿದ್ದಾರೆ.

ವೈದ್ಯರ ಪ್ರಮುಖ ಬೇಡಿಕೆಗಳಲ್ಲಿ ಪ್ರಾಥಮಿಕ ಆರೋಗ್ಯ ಸೇವೆಯಲ್ಲಿ ಆಧುನಿಕ ಔಷಧ ಬಳಕೆಗೆ ಕಾನೂನುಬದ್ಧ ಅನುಮತಿ, NCISM ಮತ್ತು NCH ಕಾಯ್ದೆಗಳ ಅನುಷ್ಠಾನ, KPME ಕಾಯಿದೆಯಡಿ ದೂರುಗಳ ಸರಿಯಾದ ಪರಿಶೀಲನೆ, ನೋಂದಣಿ ಮತ್ತು Fire NOC ಸಂಬಂಧಿತ ಸಮಸ್ಯೆಗಳ ಸರಳೀಕರಣ, ಸರ್ಕಾರಿ ಸಮಿತಿಗಳಲ್ಲಿ ಆಯುಷ್ ವೈದ್ಯರ ಪ್ರತಿನಿಧಿತ್ವ ಹಾಗೂ ಗ್ರಾಮೀಣ ಆರೋಗ್ಯ ಸೇವೆಯಲ್ಲಿ ಅವರ ಸಮರ್ಪಕ ಬಳಕೆ ಸೇರಿವೆ. ಈ ಬೇಡಿಕೆಗಳು ಸಾರ್ವಜನಿಕರಿಗೆ ಸುರಕ್ಷಿತ, ಕೈಗೆಟುಕುವ ಮತ್ತು ಸಮಗ್ರ ಆರೋಗ್ಯ ಸೇವೆ ಒದಗಿಸುವ ಉದ್ದೇಶವನ್ನು ಹೊಂದಿವೆ.

ರಾಜ್ಯಾಧ್ಯಕ್ಷ ಡಾ. ಮೋಹನ ಬಿರಾದಾರ ಮತ್ತು ಪ್ರಧಾನ ಕಾರ್ಯದರ್ಶಿ ಡಾ. ಆನಂದ್ ಕಿರಿಶಾಳ ಅವರ ನೇತೃತ್ವದಲ್ಲಿ ನಡೆಯಲಿರುವ ಈ ಹೋರಾಟದಲ್ಲಿ ವೈದ್ಯರು ಶಾಂತಿಯುತವಾಗಿ ಹಾಗೂ ಶಿಸ್ತುಬದ್ಧವಾಗಿ ಭಾಗವಹಿಸುವಂತೆ ಸಂಘಟನೆ ಮನವಿ ಮಾಡಿದೆ. "ನಮ್ಮ ಹೋರಾಟ ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಯ ವಿರುದ್ಧವಲ್ಲ; ಆಯುಷ್ ವೈದ್ಯರ ಕಾನೂನುಬದ್ಧ ಹಕ್ಕುಗಳು, ವೃತ್ತಿಪರ ಗೌರವ ಮತ್ತು ಜನತೆಗೆ ಉತ್ತಮ ಆರೋಗ್ಯ ಸೇವೆ ದೊರಕಿಸುವ ಉದ್ದೇಶದಿಂದ ನಡೆಯುತ್ತಿದೆ" ಎಂದು ಸಂಘಟನೆ ಸ್ಪಷ್ಟಪಡಿಸಿದೆ. ಬೇಡಿಕೆಗಳನ್ನು ಸರ್ಕಾರ ತಕ್ಷಣ ಪರಿಗಣಿಸಿ ಮಾತುಕತೆ ಮೂಲಕ ಪರಿಹಾರ ಕಂಡುಕೊಳ್ಳಬೇಕೆಂದು ಒತ್ತಾಯಿಸಲಾಗಿದೆ. ಬೇಡಿಕೆಗಳು ಈಡೇರುವವರೆಗೆ ಹೋರಾಟ ಮುಂದುವರಿಯಲಿದೆ ಎಂದು AFI ಕರ್ನಾಟಕ ತಿಳಿಸಿದೆ.