ಗಣಿಗಾರಿಕೆ ರಾಜಧನ ಅವ್ಯವಸ್ಥೆ: ಸರ್ಕಾರಕ್ಕೆ ಕೋಟ್ಯಾಂತರ ನಷ್ಟ, ಸಂಘದ ಎಚ್ಚರಿಕೆ

ಗಣಿಗಾರಿಕೆ ರಾಜಧನ ಅವ್ಯವಸ್ಥೆ: ಸರ್ಕಾರಕ್ಕೆ ಕೋಟ್ಯಾಂತರ ನಷ್ಟ, ಸಂಘದ ಎಚ್ಚರಿಕೆ

ಗಣಿಗಾರಿಕೆ ರಾಜಧನ ಅವ್ಯವಸ್ಥೆ: ಸರ್ಕಾರಕ್ಕೆ ಕೋಟ್ಯಾಂತರ ನಷ್ಟ, ಸಂಘದ ಎಚ್ಚರಿಕೆ

ಬೆಂಗಳೂರು, ಜು. 01-
ಕರ್ನಾಟಕ ಕ್ವಾರಿ ಮತ್ತು ಸ್ಟೋನ್ ಕ್ರಷರ್ ಮಾಲೀಕರ ಸಂಘ (ರಿ) ಸರ್ಕಾರಕ್ಕೆ ಸಲ್ಲಿಸಿರುವ ಪತ್ರಿಕಾ ಪ್ರಕಟಣೆಯಲ್ಲಿ ಗಣಿಗಾರಿಕೆ ಕ್ಷೇತ್ರದಲ್ಲಿ ನಡೆಯುತ್ತಿರುವ ರಾಜಧನ ಪಾವತಿ ಅವ್ಯವಸ್ಥೆ ಹಾಗೂ ತೆರಿಗೆ ಸೋರಿಕೆ ಕುರಿತು ತೀವ್ರ ಆಕ್ರೋಶ ವ್ಯಕ್ತಪಡಿಸಲಾಗಿದೆ. ಸಂಘದ ಪ್ರಕಾರ, ಗಣಿ ಮತ್ತು ಭೂವಿಜ್ಞಾನ ಇಲಾಖೆಯ ನಿರ್ಲಕ್ಷ್ಯದಿಂದಾಗಿ ಸರ್ಕಾರಕ್ಕೆ ಪ್ರತಿದಿನ ಕೋಟ್ಯಾಂತರ ರೂಪಾಯಿ ನಷ್ಟವಾಗುತ್ತಿದ್ದು, ಗಣಿಗುತ್ತಿಗೆದಾರರು ಸಂಕಷ್ಟಕ್ಕೆ ಸಿಲುಕುತ್ತಿದ್ದಾರೆ.

ಹಿಂದಿನ ಸರ್ಕಾರದ ಅವಧಿಯಲ್ಲಿ ಸಾರ್ವಜನಿಕ ಲೆಕ್ಕಪತ್ರಗಳ ಸಮಿತಿಯು ಕಟ್ಟಡಕಲ್ಲು ಉದ್ಯಮದಿಂದ ಮಾತ್ರವೇ ವರ್ಷಕ್ಕೆ ₹18,000–₹20,000 ಕೋಟಿಯಷ್ಟು ನಷ್ಟವಾಗುತ್ತಿದೆ ಎಂದು ವರದಿ ನೀಡಿತ್ತು. ಇದೇ ವಿಷಯವನ್ನು 2017ರ ಭಾರತ ಲೆಕ್ಕ ಪರಿಶೋಧಕರ ವರದಿಯಲ್ಲಿಯೂ ಉಲ್ಲೇಖಿಸಲಾಗಿದೆ.

2023ರ ಅಕ್ಟೋಬರ್ 12ರಂದು ನಡೆದ ಸಭೆಯಲ್ಲಿ ಗಣಿಗುತ್ತಿಗೆದಾರರಿಂದಲೇ ರಾಜಧನ ಪಾವತಿಸಿ ಖನಿಜಗಳನ್ನು ಖರೀದಿಸುವಂತೆ ತೀರ್ಮಾನಿಸಲಾಯಿತು. ನಂತರ 2024ರ ಫೆಬ್ರವರಿ 6 ಮತ್ತು 14ರಂದು ಇಲಾಖೆಯಿಂದ ಸುತ್ತೋಲೆಗಳನ್ನು ಹೊರಡಿಸಲಾಯಿತು. ಆದರೆ, ಈ ನಿರ್ಧಾರಗಳನ್ನು ಯಾವುದೇ ಇಲಾಖೆಗಳು ಪಾಲಿಸದಿರುವುದರಿಂದ ತೆರಿಗೆ ಸೋರಿಕೆ ಮುಂದುವರಿದಿದೆ.

ಸಂಘದ ಪ್ರಕಾರ, ಪ್ರತೀ ಟನ್‌ಗೆ ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳಿಗೆ ಜಿಎಸ್‌ಟಿ, ಡಿಎಂಎಫ್, ಎ.ಪಿ. ತೆರಿಗೆಗಳು ವಿಧಿಸಲಾಗಬೇಕಾದರೂ ಅವು ಸರಿಯಾಗಿ ಸಂಗ್ರಹವಾಗುತ್ತಿಲ್ಲ. ಇದರಿಂದ ಸರ್ಕಾರಕ್ಕೆ ಭಾರೀ ನಷ್ಟವಾಗುತ್ತಿದೆ.

ರಾಜ್ಯದ ರಾಮನಗರದಲ್ಲಿ ಲಾರಿ ಮಾಲಕರೊಬ್ಬರು ತಾಳಲಾರದೇ ಆತ್ಮಹತ್ಯೆ ಮಾಡಿಕೊಂಡ ಘಟನೆಗೆ ಸಂಘವು ಉದಾಹರಣೆ ನೀಡಿದೆ. ಇದರಿಂದ ಗಣಿಗುತ್ತಿಗೆದಾರರು ಎದುರಿಸುತ್ತಿರುವ ಸಂಕಷ್ಟದ ಗಂಭೀರತೆ ಸ್ಪಷ್ಟವಾಗುತ್ತದೆ ಎಂದು ಸಂಘವು ಹೇಳಿದೆ.

ಹೊರರಾಜ್ಯಗಳಿಂದ ತಮಿಳುನಾಡು, ತೆಲಂಗಾಣ, ಆಂಧ್ರಪ್ರದೇಶ, ಮಹಾರಾಷ್ಟ್ರಗಳಿಂದ ಕಟ್ಟಡಕಲ್ಲು ಉತ್ಪನ್ನಗಳು ಕರ್ನಾಟಕಕ್ಕೆ ಪೂರೈಕೆಯಾಗುತ್ತಿದ್ದು, ಇದರಿಂದ ರಾಜ್ಯಕ್ಕೆ ತೆರಿಗೆ ಸೋರಿಕೆ ಹೆಚ್ಚುತ್ತಿದೆ.

ಸಂಘವು ಸರ್ಕಾರದ ಕ್ರಮಗಳನ್ನು “ಅವೈಜ್ಞಾನಿಕ” ಎಂದು ಟೀಕಿಸಿದೆ. ಕ್ರಷರ್ ಘಟಕಗಳ ಉತ್ಪಾದನಾ ಸಾಮರ್ಥ್ಯವನ್ನು ವಿದ್ಯುತ್ ಬಿಲ್ ಆಧಾರವಾಗಿ ಲೆಕ್ಕ ಹಾಕಿ ದಂಡ ವಿಧಿಸುವುದು, ಲಾರಿಗಳಿಗೆ ಜಿ.ಪಿ.ಎಸ್ ಅಳವಡಿಸಿ ದಂಡ ವಿಧಿಸುವುದು, ಡ್ರೋನ್ ಸರ್ವೆ ಮೂಲಕ ಏಕಪಕ್ಷೀಯವಾಗಿ ಲೆಕ್ಕ ಪರಿಶೋಧನೆ ನಡೆಸುವುದು ,ಇವು ಗಣಿಗುತ್ತಿಗೆದಾರರ ಮೇಲೆ ಅನ್ಯಾಯವಾಗುತ್ತಿದೆ ಎಂದು ಸಂಘವು ಆರೋಪಿಸಿದೆ.

ಈ ಹಿನ್ನೆಲೆಯಲ್ಲಿ ಸಂಘವು ತನ್ನ ಕಾನೂನುಬದ್ಧ ಬೇಡಿಕೆಗಳನ್ನು ಸರ್ಕಾರದ ಮುಂದೆ ಇಟ್ಟಿದೆ. ಖಾಸಗಿ ಮತ್ತು ಸರ್ಕಾರಿ ಕಾಮಗಾರಿಗಳಿಗೆ ಉಪಯೋಗಿಸುವ ಖನಿಜಗಳ ರಾಜಧನ ಪಾವತಿ ವ್ಯವಸ್ಥೆಯನ್ನು ಸಮರ್ಪಕಗೊಳಿಸುವುದು, ಹೊರರಾಜ್ಯಗಳಿಂದ ಬರುವ ಉತ್ಪನ್ನಗಳ ಪರವಾನಗಿ ಪರಿಶೀಲನೆ, ಈಗಾಗಲೇ ವಿಧಿಸಿರುವ ದಂಡಗಳನ್ನು ಮನ್ನಾ ಮಾಡುವುದು, ಆತ್ಮಹತ್ಯೆ ಮಾಡಿಕೊಂಡ ಲಾರಿ ಮಾಲಕರ ಕುಟುಂಬಕ್ಕೆ ಪರಿಹಾರ ನೀಡುವುದು, ಗಣಿಗುತ್ತಿಗೆ ಅರ್ಜಿಗಳನ್ನು ತ್ವರಿತವಾಗಿ ಮಂಜೂರು ಮಾಡುವುದು—ಇವು ಪ್ರಮುಖ ಬೇಡಿಕೆಗಳಾಗಿವೆ.

ಸಂಘವು ಎಚ್ಚರಿಕೆ ನೀಡಿದ್ದು, ಬೇಡಿಕೆಗಳನ್ನು ಸರ್ಕಾರ ತಕ್ಷಣವೇ ಪರಿಗಣಿಸದಿದ್ದರೆ ಮುಂದಿನ ದಿನಗಳಲ್ಲಿ ಉಗ್ರ ಹೋರಾಟ ನಡೆಸುವುದು ಅನಿವಾರ್ಯವಾಗುತ್ತದೆ.

ಇಂತಿ,
ಡಾ. ರವೀಂದ್ರ ಶೆಟ್ಟಿ ಬಜಗೊಳ್ಳಿ
ರಾಜ್ಯಾಧ್ಯಕ್ಷರು,
ಕರ್ನಾಟಕ ಕ್ವಾರಿ ಮತ್ತು ಸ್ಟೋನ್ ಕ್ರಷರ್ ಮಾಲೀಕರ ಸಂಘ (ರಿ), ಬೆಂಗಳೂರು.