ವಿಕಸಿತ ಭಾರತ 2047ಕ್ಕೆ ವಿಜ್ಞಾನ ಮತ್ತು ನಾವೀನ್ಯತೆಯೇ ದಿಕ್ಸೂಚಿ ಬೆಂಗಳೂರಿನಲ್ಲಿ "ರೈಸ್ ಕಾನ್ ಕ್ಲೇವ್- 2026" ಉದ್ಘಾಟಿಸಿದ ಕೇಂದ್ರ ಸಚಿವ ಡಾ. ಜಿತೇಂದ್ರ ಸಿಂಗ್

ವಿಕಸಿತ ಭಾರತ 2047ಕ್ಕೆ ವಿಜ್ಞಾನ ಮತ್ತು ನಾವೀನ್ಯತೆಯೇ ದಿಕ್ಸೂಚಿ ಬೆಂಗಳೂರಿನಲ್ಲಿ "ರೈಸ್ ಕಾನ್ ಕ್ಲೇವ್- 2026" ಉದ್ಘಾಟಿಸಿದ ಕೇಂದ್ರ ಸಚಿವ ಡಾ. ಜಿತೇಂದ್ರ ಸಿಂಗ್

ವಿಕಸಿತ ಭಾರತ 2047ಕ್ಕೆ ವಿಜ್ಞಾನ ಮತ್ತು ನಾವೀನ್ಯತೆಯೇ ದಿಕ್ಸೂಚಿ

ಬೆಂಗಳೂರಿನಲ್ಲಿ "ರೈಸ್ ಕಾನ್ ಕ್ಲೇವ್- 2026" ಉದ್ಘಾಟಿಸಿದ ಕೇಂದ್ರ ಸಚಿವ ಡಾ. ಜಿತೇಂದ್ರ ಸಿಂಗ್

​ಬೆಂಗಳೂರು, ಜೂ. 13 -

ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಭಾರತವು ಆತ್ಮನಿರ್ಭರತೆಯತ್ತ ಮುನ್ನಡೆಯುತ್ತಿದ್ದು, 'ವಿಕಸಿತ ಭಾರತ 2047'ರ ಗುರಿ ತಲುಪಲು ವಿಜ್ಞಾನ, ತಂತ್ರಜ್ಞಾನ ಮತ್ತು ನಾವೀನ್ಯತೆಗಳು ಪ್ರಮುಖ ಪಾತ್ರ ವಹಿಸಲಿವೆ ಎಂದು ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವ ಡಾ. ಜಿತೇಂದ್ರ ಸಿಂಗ್ ತಿಳಿಸಿದರು.

​ಇಂದು ಬೆಂಗಳೂರಿನ ಹೆಚ್.ಎ.ಎಲ್ ರಸ್ತೆಯಲ್ಲಿರುವ ಎನ್.ಎ.ಎಲ್ ನ ವಿ. ಎಂ. ಘಾಟಗೆ ಕನ್ವೆನ್ಷನ್ ಸಭಾಂಗಣದಲ್ಲಿ ಹಮ್ಮಿಕೊಳ್ಳಲಾದ ‌ ವಿಕಸಿತ ಭಾರತ 2047 ಕ್ಕಾಗಿ ನಾವೀನ್ಯತೆ ಮತ್ತು ಉದ್ಯಮಶೀಲತೆ ಆಧಾರಿತ ಬೆಳವಣಿಗೆ ಎಂಬ ವಿಷಯದ ಮೇಲಿನ ರಾಷ್ಟ್ರೀಯ ರೈಸ್ ಕಾನ್ ಕ್ಲೇವ್' (RISE Conclave - Research, Industry, Start-up and Entrepreneurship) ಅನ್ನು ಉದ್ಘಾಟಿಸಿ ಮಾತನಾಡಿದ ಅವರು, ಕೌನ್ಸಿಲ್ ಆಫ್ ಸೈಂಟಿಫಿಕ್ ಅಂಡ್ ಇಂಡಸ್ಟ್ರಿಯಲ್ ರಿಸರ್ಚ್ (CSIR) ಮತ್ತು ಅದರ ಅಂಗಸಂಸ್ಥೆಯಾದ ನ್ಯಾಷನಲ್ ಏರೋಸ್ಪೇಸ್ ಲ್ಯಾಬೊರೇಟರೀಸ್ (NAL) ಈ ಕಾರ್ಯಕ್ರಮವನ್ನು ತಂತ್ರಜ್ಞಾನ ಪ್ರದರ್ಶನ ಮತ್ತು ಸ್ಟಾರ್ಟ್-ಅಪ್‌ಗಳ ಹಬ್ಬವನ್ನಾಗಿ ಹಮ್ಮಿಕೊಂಡಿದೆ. ಈ‌ ಕಾರ್ಯಕ್ರಮದಲ್ಲಿ ಏರೋಸ್ಪೇಸ್, ಫುಡ್ ಟೆಕ್ನಾಲಜಿ, ಡೇಟಾ ಸೈನ್ಸ್ ಮತ್ತು ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಕ್ಷೇತ್ರಗಳ 100ಕ್ಕೂ ಹೆಚ್ಚು ಸ್ಟಾರ್ಟ್-ಅಪ್‌ಗಳು ತಮ್ಮ ಅತ್ಯಾಧುನಿಕ ಉತ್ಪನ್ನಗಳನ್ನು ಇಲ್ಲಿ ಪ್ರದರ್ಶಿಸುತ್ತಿವೆ ಎಂದು ಹೇಳಿದರು.

ಪ್ರತಿದಿನ ಸುಮಾರು 400 ವಿದ್ಯಾರ್ಥಿಗಳು ಹಾಗೂ ಯುವ ಸಂಶೋಧಕರು ಇಲ್ಲಿನ ವಿಜ್ಞಾನ ಮತ್ತು ತಂತ್ರಜ್ಞಾನದ ಪೆವಿಲಿಯನ್‌ಗಳಿಗೆ ಭೇಟಿ ನೀಡಿ ಸಂವಾದ ನಡೆಸಲಿದ್ದಾರೆ ಎಂದು‌ ತಿಳಿಸುತ್ತಾ, ಏರೋಸ್ಪೇಸ್ ಕ್ಷೇತ್ರದಲ್ಲಿ ಭಾರತ ಸಾಧಿಸಿರುವ ಮೈಲುಗಲ್ಲು ಮತ್ತು ಪ್ರಗತಿಯನ್ನು ಶ್ಲಾಘಿಸಿದರು.

ಹಂಸ-3 (NG): ವಾಣಿಜ್ಯ ಪೈಲಟ್ ಪರವಾನಗಿಗಾಗಿ (CPL) ದೇಶಿಯವಾಗಿ ವಿನ್ಯಾಸಗೊಳಿಸಲಾದ ತರಬೇತಿ ವಿಮಾನ.
​19-ಸೀಟರ್ ಲಘು ಸಾರಿಗೆ ವಿಮಾನ (LTA): ಶ್ರೇಣಿ-1 ಮತ್ತು ಶ್ರೇಣಿ-2 ನಗರಗಳನ್ನು ಜೋಡಿಸಲು ಇದು ಅಭಿವೃದ್ಧಿ ಹಂತದಲ್ಲಿದೆ.

ಹೈ ಆಲ್ಟಿಟ್ಯೂಡ್ ಪ್ಲಾಟ್‌ಫಾರ್ಮ್ (HAP): ನಿರಂತರ ಕಣ್ಗಾವಲು ನಡೆಸಲು ಸೌರಶಕ್ತಿಯಿಂದ ಚಲಿಸುವ ಡ್ರೋನ್ ತಂತ್ರಜ್ಞಾನ.

ಭವಿಷ್ಯದ ಯುಎವಿ (UAV): ವಾಯುಮಂಡಲದ (Stratosphere) 20 ಕಿಲೋಮೀಟರ್‌ಗಿಂತಲೂ ಹೆಚ್ಚಿನ ಎತ್ತರದಲ್ಲಿ ಹಾರಬಲ್ಲ 'ಹೈ ಆಲ್ಟಿಟ್ಯೂಡ್ ಸೂಡೊ-ಸ್ಯಾಟಲೈಟ್‌ಗಳನ್ನು' ಭಾರತ ಅಭಿವೃದ್ಧಿಪಡಿಸುತ್ತಿದ್ದು, ಈ ಮೂಲಕ ಅಮೆರಿಕ, ಬ್ರಿಟನ್, ಜಪಾನ್‌ನಂತಹ ಆಯ್ದ ದೇಶಗಳ ಸಾಲಿಗೆ ಭಾರತವೂ ಸೇರಲಿದೆ.

ಆಹಾರ ತಂತ್ರಜ್ಞಾನ ಮತ್ತು ಎಐ (AI) ಕ್ಷೇತ್ರದಲ್ಲಿ ಕ್ರಾಂತಿ

​ಭಾರತದ ಆಹಾರ ಸಂಸ್ಕರಣಾ ಉದ್ಯಮವು ಪ್ರಸ್ತುತ ಸುಮಾರು 530 ಬಿಲಿಯನ್ ಡಾಲರ್ ಮೌಲ್ಯದ್ದಾಗಿದ್ದು, 2030ರ ವೇಳೆಗೆ ವಿಶ್ವದಲ್ಲೇ ಅತಿ ದೊಡ್ಡದಾಗುವ ಹಾದಿಯಲ್ಲಿದೆ ಎಂದು ಸಚಿವರು ತಿಳಿಸಿದರು.

ಮೈಸೂರಿನ CSIR-CFTRI ಸಂಸ್ಥೆಯು ಎಮ್ಮೆ ಹಾಲಿನಿಂದ ಮಕ್ಕಳ ಆಹಾರ (ಇನ್ಫೆಂಟ್ ಫುಡ್) ತಯಾರಿಸುವ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿ ಅದನ್ನು 'ಅಮುಲ್' ಸಂಸ್ಥೆಗೆ ವರ್ಗಾಯಿಸಿದ್ದನ್ನು ಹಾಗೂ ಇಡ್ಲಿ-ದೋಸೆ ಹಿಟ್ಟಿನ ಗುಣಮಟ್ಟವನ್ನು ಪ್ರಮಾಣೀಕರಿಸಿದ್ದನ್ನು ಅವರು ನೆನಪಿಸಿಕೊಂಡರು.

ಮೆಕ್‌ಡೊನಾಲ್ಡ್ಸ್‌ನಂತಹ ಜಾಗತಿಕ ಸಂಸ್ಥೆಗಳು ಭಾರತದಲ್ಲಿ ಸಿರಿಧಾನ್ಯ (Millet) ಆಧಾರಿತ ಉತ್ಪನ್ನಗಳನ್ನು ಪರಿಚಯಿಸುತ್ತಿರುವುದು ಭಾರತದ ಬೆಳವಣಿಗೆಗೆ ಸಾಕ್ಷಿ ಎಂದರು.

​ಇದೇ ವೇಳೆ, ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರವನ್ನು ಕೇವಲ ಡಿಜಿಟಲ್ ತಂತ್ರಜ್ಞಾನವಾಗಿ ನೋಡದೆ, ಭವಿಷ್ಯದ ಮೂಲಭೂತ ಅಗತ್ಯವಾಗಿ ಬಳಸಿಕೊಳ್ಳಲು CSIR ರಾಷ್ಟ್ರೀಯ ಕೇಂದ್ರವಾಗಿ ಹೊರಹೊಮ್ಮುತ್ತಿದೆ ಎಂದು ಅವರು ತಿಳಿಸಿದರು.

ಮಹಿಳಾ ಉದ್ಯಮಶೀಲತೆಗೆ ಆದ್ಯತೆ ಮತ್ತು ಒಪ್ಪಂದಗಳು

​ಕಾರ್ಯಕ್ರಮದಲ್ಲಿ ಮಾತನಾಡಿದ CSIR ಮಹಾನಿರ್ದೇಶಕಿ ಡಾ. ಕಲೈಸೆಲ್ವಿ ಅವರು, ಈ ಸಮಾವೇಶದಲ್ಲಿ ಬಾಷ್, ಐಬಿಎಂ, ಇಸ್ರೋ, ಐಐಎಸ್‌ಸಿ ಮುಂತಾದ ಪ್ರಮುಖ ಸಂಸ್ಥೆಗಳ ತಜ್ಞರು ಭಾಗವಹಿಸುತ್ತಿದ್ದಾರೆ ಎಂದರು.

ಪ್ರದರ್ಶನದಲ್ಲಿ ಸಿರಿಧಾನ್ಯ ಕ್ರಾಂತಿ, ಪ್ರೋಟೀನ್ ಆವಿಷ್ಕಾರಗಳಂತಹ ಕ್ಷೇತ್ರಗಳಲ್ಲಿ ಮಹಿಳಾ ಉದ್ಯಮಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿರುವುದು ಮಹಿಳಾ ಸಬಲೀಕರಣಕ್ಕೆ ಹಿಡಿದ ಕನ್ನಡಿಯಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.

​ಇಸ್ರೋ (ISRO) ಅಧ್ಯಕ್ಷರು ಮಾತನಾಡಿ, ವಿಕಸಿತ ಭಾರತದ ಗುರಿ ತಲುಪಲು 'ಸ್ಪೇಸ್ ವಿಷನ್ 2047' ಮತ್ತು ಬಾಹ್ಯಾಕಾಶ ವಲಯದ ಸುಧಾರಣೆಗಳು ಪ್ರಮುಖ ಚಾಲನಾ ಶಕ್ತಿಯಾಗಲಿವೆ ಎಂದು ಹೇಳಿದರು.

​ಪ್ರಮುಖ ಒಪ್ಪಂದಗಳು:

ಈ ಸಮಾವೇಶದಲ್ಲಿ ಜಂಟಿ ಸಂಶೋಧನೆ ಮತ್ತು ಉದ್ಯಮಶೀಲತೆಯನ್ನು ಉತ್ತೇಜಿಸಲು ಐಐಟಿ-ಧಾರವಾಡ, ಐಐಟಿಎಂ-ಚೆನ್ನೈ, ಸತ್ಯಸಾಯಿ ವಿಶ್ವವಿದ್ಯಾಲಯ, ಐಸಿಎಆರ್-ನಿವೇದಿ ಮತ್ತು ಐಐಎಂ-ನಾಗ್ಪುರ ಸಂಸ್ಥೆಗಳೊಂದಿಗೆ ಪ್ರಮುಖ ತಿಳುವಳಿಕಾ ಪತ್ರಗಳಿಗೆ (MoU) ಸಹಿ ಹಾಕಲಾಯಿತು. ಅಲ್ಲದೆ, ಸ್ಟಾರ್ಟ್-ಅಪ್ ಸಂಸ್ಥೆಯಾದ ಚೆನ್ನೈನ ಮೆಸರ್ಸ್ ಟ್ರೈಡೆಂಟ್ ಟೆಕ್ ಎಂಜಿನಿಯರಿಂಗ್‌ಗೆ 'ವಾಂಕೆಲ್ ಎಂಜಿನ್' ಅನ್ನು ಹಸ್ತಾಂತರಿಸಲಾಯಿತು.

​ಕಾರ್ಯಕ್ರಮದಲ್ಲಿ CSIR-NAL ನಿರ್ದೇಶಕ ಡಾ. ಅಭಯ್ ಎ. ಪಾಶಿಲ್ಕರ್, CFTRI ನಿರ್ದೇಶಕ ಡಾ. ಗಿರಿಧರ್ ಪರ್ವತಂ ಮತ್ತು CSIR-4PI ನಿರ್ದೇಶಕ ಡಾ. ಜಿ.ಕೆ. ಪಾತ್ರಾ ಸೇರಿದಂತೆ ಉದ್ಯಮ ಹಾಗೂ ಶೈಕ್ಷಣಿಕ ವಲಯದ 800ಕ್ಕೂ ಹೆಚ್ಚು ಪ್ರತಿನಿಧಿಗಳು ಉಪಸ್ಥಿತರಿದ್ದರು.