ಮಹಿಳಾ ಸುರಕ್ಷತೆಗಾಗಿ ಶಾಲಾ ಶಿಕ್ಷಣ ಇಲಾಖೆಯಲ್ಲಿ ಲೈಂಗಿಕ ಕಿರುಕುಳ ತಡೆ ಕಾಯ್ದೆ 2013ರಡಿ ಆಂತರಿಕ ದೂರು ಸಮಿತಿ ಪುನರ್ ರಚನೆ

ಮಹಿಳಾ ಸುರಕ್ಷತೆಗಾಗಿ ಶಾಲಾ ಶಿಕ್ಷಣ ಇಲಾಖೆಯಲ್ಲಿ ಲೈಂಗಿಕ ಕಿರುಕುಳ ತಡೆ ಕಾಯ್ದೆ 2013ರಡಿ ಆಂತರಿಕ ದೂರು ಸಮಿತಿ ಪುನರ್ ರಚನೆ

ಮಹಿಳಾ ಸುರಕ್ಷತೆಗಾಗಿ ಶಾಲಾ ಶಿಕ್ಷಣ ಇಲಾಖೆಯಲ್ಲಿ ಲೈಂಗಿಕ ಕಿರುಕುಳ ತಡೆ ಕಾಯ್ದೆ 2013ರಡಿ ಆಂತರಿಕ ದೂರು ಸಮಿತಿ ಪುನರ್ ರಚನೆ"

ಬೆಂಗಳೂರು,ಆ. 18-ಶಾಲಾ ಶಿಕ್ಷಣ ಇಲಾಖೆಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಮಹಿಳಾ ಅಧಿಕಾರಿ ಹಾಗೂ ಸಿಬ್ಬಂದಿ ವರ್ಗದವರ ದೂರುಗಳನ್ನು ಪರಿಶೀಲಿಸಿ, ಲೈಂಗಿಕ ಕಿರುಕುಳ (ತಡೆ, ನಿಯಂತ್ರಣ ಮತ್ತು ನಿವಾರಣೆ) ಸಿಬ್ಬಂದಿಗಳ ಕಾಯ್ದೆ 2013ರಡಿ ಆಂತರಿಕ ದೂರು ಸಮಿತಿಯನ್ನು ಪುನರ್ ರಚಿಸಲಾಗಿದೆ. ಆಯುಕ್ತರ ಕಛೇರಿಯಿಂದ 18 ಆಗಸ್ಟ್ 2026ರಂದು ಅಧಿಕೃತ ಜ್ಞಾಪನ ಹೊರಡಿಸಲಾಗಿದ್ದು, ಮಹಿಳಾ ಹಕ್ಕುಗಳ ರಕ್ಷಣೆ, ದೂರುಗಳ ಮೇಲ್ವಿಚಾರಣೆ ಹಾಗೂ ತ್ವರಿತ ಪರಿಹಾರಕ್ಕಾಗಿ ಈ ಸಮಿತಿಯು ಕಾರ್ಯನಿರ್ವಹಿಸಲಿದೆ. ರಾಜ್ಯ ಮಹಿಳಾ ಆಯೋಗದ ನಿರ್ದೇಶನದನ್ವಯ, ಇಲಾಖೆಯಲ್ಲಿನ ದೂರುಗಳನ್ನು ಪರಿಣಾಮಕಾರಿಯಾಗಿ ಪರಿಹರಿಸಲು ಈ ಕ್ರಮ ಕೈಗೊಳ್ಳಲಾಗಿದೆ.

ಹೊಸ ಸಮಿತಿಯ ಅಧ್ಯಕ್ಷರಾಗಿ ಪ್ರಾಥಮಿಕ ಶಿಕ್ಷಣ ನಿರ್ದೇಶಕಿ ಶ್ರೀಮತಿ ಹೆಚ್.ಕೆ. ಪುಷ್ಪಲತಾ ಅವರನ್ನು ನೇಮಿಸಲಾಗಿದೆ. ಸದಸ್ಯರಾಗಿ ಶಾಂತಲಾ ಆರ್ (ಪ್ರೌಢ ಶಿಕ್ಷಣ ಉಪ ನಿರ್ದೇಶಕಿ), ಮಂಜುನಾಥ್ (ಪ್ರಾಥಮಿಕ ಶಿಕ್ಷಣ ಉಪ ನಿರ್ದೇಶಕರು), ಬೈಯಪ್ಪರೆಡ್ಡಿ (ಹಿರಿಯ ಸಹಾಯಕ ನಿರ್ದೇಶಕರು), ರಾಘವಿ ನಾಯಕ್ (ಹಿರಿಯ ಸಹಾಯಕ ನಿರ್ದೇಶಕರು), ನಾಗಮಣಿ ಪಿ.ಎಸ್ (ಹಿರಿಯ ಸಹಾಯಕ ನಿರ್ದೇಶಕರು – ಸದಸ್ಯ ಕಾರ್ಯದರ್ಶಿ), ವೆಂಕಟರತ್ನ (ಅಧೀಕ್ಷಕರು) ಹಾಗೂ ಎನ್.ಜಿ.ಓ ಪ್ರತಿನಿಧಿಯಾಗಿ ಡೋನಾ ಫೆರ್ನಾಂಡಿಸ್ ಅವರನ್ನು ಸೇರಿಸಲಾಗಿದೆ.

ಸಮಿತಿಯು ಇಲಾಖೆಗೆ ಸಂಬಂಧಿಸಿದ ಯಾವುದೇ ದೂರುಗಳನ್ನು ಸ್ವೀಕರಿಸಿ ನಿಯಮಾನುಸಾರ ಪರಿಶೀಲಿಸಿ ನಿಗದಿತ ಅವಧಿಯಲ್ಲಿ ಪರಿಹರಿಸಲಿದೆ. ಎಲ್ಲಾ ವಿಭಾಗಗಳಲ್ಲಿ ಸ್ವೀಕೃತವಾಗುವ ದೂರುಗಳ ವಿಚಾರಣೆ ನಡೆಸಿ ಅಂತಿಮ ವರದಿ ಆಯುಕ್ತರಿಗೆ ಸಲ್ಲಿಸಲಾಗುವುದು. ಸಮಿತಿಯ ಕಾರ್ಯಪದ್ಧತಿಗಳನ್ನು ನಿರ್ವಹಿಸಲು ರಾಘವಿ ನಾಯಕ್ ಅವರನ್ನು ನೋಡಲ್ ಅಧಿಕಾರಿಯಾಗಿ ನೇಮಿಸಲಾಗಿದ್ದು, ವೆಂಕಟರತ್ನ ಅವರು ಪತ್ರ ವ್ಯವಹಾರ ಮತ್ತು ಕಡತ ನಿರ್ವಹಣೆಯ ಜವಾಬ್ದಾರಿಯನ್ನು ವಹಿಸಲಿದ್ದಾರೆ.

ಲೈಂಗಿಕ ಕಿರುಕುಳ ತಡೆ, ನಿಯಂತ್ರಣ ಮತ್ತು ನಿವಾರಣೆ ಕಾಯ್ದೆ 2013 ಭಾರತದಲ್ಲಿ ಮಹಿಳೆಯರ ಕೆಲಸದ ಸ್ಥಳದಲ್ಲಿ ಸುರಕ್ಷತೆ ಮತ್ತು ಗೌರವವನ್ನು ಖಚಿತಪಡಿಸಲು ಜಾರಿಗೆ ಬಂದ ಪ್ರಮುಖ ಕಾನೂನು. ಈ ಕಾಯ್ದೆ 22 ಏಪ್ರಿಲ್ 2013ರಂದು ಜಾರಿಗೆ ಬಂದು ದೇಶದಾದ್ಯಂತ ಅನ್ವಯವಾಗುತ್ತದೆ. ಇದರ ಉದ್ದೇಶ ಮಹಿಳೆಯರ ಮೇಲೆ ಕೆಲಸದ ಸ್ಥಳದಲ್ಲಿ ಲೈಂಗಿಕ ಕಿರುಕುಳವನ್ನು ತಡೆಗಟ್ಟುವುದು, ನಿಷೇಧಿಸುವುದು ಮತ್ತು ದೂರುಗಳನ್ನು ಪರಿಹರಿಸುವುದಾಗಿದೆ. ಸಂವಿಧಾನದ ಕಲಂ 14, 15 ಮತ್ತು 21ರ ಅಡಿಯಲ್ಲಿ ನೀಡಿರುವ ಸಮಾನತೆ ಹಾಗೂ ಗೌರವದ ಹಕ್ಕುಗಳನ್ನು ಬಲಪಡಿಸುವುದೇ ಇದರ ಮೂಲ ಉದ್ದೇಶ.

ಪ್ರತಿ ಸಂಸ್ಥೆಯಲ್ಲಿ 10ಕ್ಕಿಂತ ಹೆಚ್ಚು ಉದ್ಯೋಗಿಗಳು ಇದ್ದರೆ ಆಂತರಿಕ ದೂರು ಸಮಿತಿಯನ್ನು ರಚಿಸುವುದು ಕಡ್ಡಾಯವಾಗಿದೆ. ಈ ಸಮಿತಿಯಲ್ಲಿ ಮಹಿಳಾ ಅಧ್ಯಕ್ಷರು ಇರಬೇಕು ಮತ್ತು ಎನ್.ಜಿ.ಓ ಪ್ರತಿನಿಧಿ ಅಥವಾ ಮಹಿಳಾ ಹಕ್ಕುಗಳ ಕ್ಷೇತ್ರದಲ್ಲಿ ಕೆಲಸ ಮಾಡುವ ವ್ಯಕ್ತಿಯೂ ಸದಸ್ಯರಾಗಿರಬೇಕು. ದೂರುಗಳನ್ನು 90 ದಿನಗಳೊಳಗೆ ಪರಿಶೀಲಿಸಿ ವರದಿ ಸಲ್ಲಿಸುವುದು ಸಮಿತಿಯ ಕರ್ತವ್ಯವಾಗಿದೆ. 10ಕ್ಕಿಂತ ಕಡಿಮೆ ಉದ್ಯೋಗಿಗಳಿರುವ ಸಂಸ್ಥೆಗಳಲ್ಲಿ ಜಿಲ್ಲಾ ಅಧಿಕಾರಿಗಳ ನೇತೃತ್ವದಲ್ಲಿ ಸ್ಥಳೀಯ ದೂರು ಸಮಿತಿಯನ್ನು ರಚಿಸಲಾಗುತ್ತದೆ.

ಮಹಿಳೆಯರು ಲೈಂಗಿಕ ಕಿರುಕುಳದ ಬಗ್ಗೆ ಲೇಖಿತ ದೂರು ಸಲ್ಲಿಸಬಹುದು. ಸಮಿತಿಯು ತನಿಖೆ ನಡೆಸಿ ವರದಿ ಸಲ್ಲಿಸುವುದರ ಜೊತೆಗೆ ತನಿಖೆಯ ಅವಧಿಯಲ್ಲಿ ಮಹಿಳೆಯರ ಸುರಕ್ಷತೆಗಾಗಿ ತಾತ್ಕಾಲಿಕ ಕ್ರಮಗಳನ್ನು ಕೈಗೊಳ್ಳಬಹುದು. ಕೆಲಸದ ಸ್ಥಳದಲ್ಲಿ ಸುರಕ್ಷಿತ ವಾತಾವರಣ ಒದಗಿಸುವುದು, ಜಾಗೃತಿ ಕಾರ್ಯಕ್ರಮಗಳನ್ನು ಆಯೋಜಿಸುವುದು ಮತ್ತು ಸಮಿತಿಯ ವರದಿಗಳನ್ನು ವಾರ್ಷಿಕ ವರದಿಯಲ್ಲಿ ಸೇರಿಸುವುದು ನಿಯೋಜಕರ ಕರ್ತವ್ಯವಾಗಿದೆ.

ಸಮಿತಿಯ ನಿರ್ದೇಶನಗಳನ್ನು ಪಾಲಿಸದಿದ್ದರೆ ದಂಡ ವಿಧಿಸಲಾಗುತ್ತದೆ. ಸುಳ್ಳು ದೂರು ಸಲ್ಲಿಸಿದರೆ ಶಿಕ್ಷೆ ಮತ್ತು ಪರಿಹಾರ ಮೊತ್ತ ವಿಧಿಸಲಾಗುತ್ತದೆ. ಈ ಕಾಯ್ದೆಯು ಮಹಿಳೆಯರ ಕೆಲಸದ ಸ್ಥಳದಲ್ಲಿ ಗೌರವ, ಸುರಕ್ಷತೆ ಮತ್ತು ಸಮಾನತೆ ಖಚಿತಪಡಿಸಲು ಪ್ರಮುಖ ಹೆಜ್ಜೆಯಾಗಿದೆ.