ತುಮಕೂರು ಡಿಸಿಸಿ ಬ್ಯಾಂಕ್: ರೈತರ ಷೇರು, ಠೇವಣಿ ಆಧಾರಿತ ಸಾಲ – 25.60 ಕೋಟಿ ಲಾಭ, 12.20% ಡಿವಿಡೆಂಡ್ ಘೋಷಣೆ

ವ್ಯಾಪಾರ, ವ್ಯವಹಾರಗಳನ್ನು ಬ್ಯಾಂಕಿನ ಮೂಲಕ ನಡೆಸಿದರೆ ಸಂಸ್ಥೆಯ ಅಭಿವೃದ್ಧಿಗೆ ಸಹಕಾರಿ;ಕೆ.ಎನ್. ರಾಜಣ್ಣ

ತುಮಕೂರು: ನಗರದ ಡಿ.ಸಿ.ಸಿ. ಬ್ಯಾಂಕ್ ಕೇಂದ್ರ ಕಛೇರಿಯಲ್ಲಿ 2026-27ನೇ ಸಾಲಿನ 72ನೇ ವಾರ್ಷಿಕ ಮಹಾಸಭೆ ಸರ್ವ ಸದಸ್ಯರ ಸಮಾರಂಭ ಜರುಗಿತು. ಈ ಸಂದರ್ಭದಲ್ಲಿ ಮಾಜಿ ಸಹಕಾರ ಸಚಿವರು ಹಾಗೂ ಡಿ.ಸಿ.ಸಿ. ಬ್ಯಾಂಕ್ ಅಧ್ಯಕ್ಷರಾದ ಕೆ.ಎನ್. ರಾಜಣ್ಣ ಅವರು ಸಹಕಾರಿ ಕ್ಷೇತ್ರದಲ್ಲಿ ತೊಡಗಿಕೊಂಡಿರುವವರು ಕೇವಲ ಸಾಲಕ್ಕಾಗಿ ಬ್ಯಾಂಕಿಗೆ ಬರುವುದನ್ನು ಬಿಟ್ಟು ತಮ್ಮ ವ್ಯಾಪಾರ, ವ್ಯವಹಾರಗಳನ್ನು ಬ್ಯಾಂಕಿನ ಮೂಲಕ ನಡೆಸಿದರೆ ಸಂಸ್ಥೆಯ ಅಭಿವೃದ್ಧಿಗೆ ಸಹಕಾರಿಯಾಗುತ್ತದೆ ಎಂದು ಹೇಳಿದರು. ಸಹಕಾರಿ ಬ್ಯಾಂಕುಗಳಲ್ಲಿ ಸಾಲ ಪಡೆಯುವುದು ಜನರ ಹಕ್ಕು, ಮರುಪಾವತಿ ಅವರ ಜವಾಬ್ದಾರಿ ಎಂದು ಅವರು ನೆನಪಿಸಿದರು. ಬರಗಾಲದಲ್ಲಿ ಬೆಳೆ ಸಾಲ ಪಡೆಯುವುದರಿಂದ ಪ್ರಯೋಜನವಿಲ್ಲ, ಬದಲಿಗೆ ಹಸು, ಕುರಿ ಸಾಕಾಣಿಕೆ ಸಾಲ ಪಡೆದರೆ ಆದಾಯ ಹೆಚ್ಚುತ್ತದೆ ಎಂದು ಸಲಹೆ ನೀಡಿದರು. ಒಂದು ಸಾಲ ತೀರಿಸಲು ಮತ್ತೊಂದು ಸಾಲ ಪಡೆಯುವುದು ತಪ್ಪು, ಇದರಿಂದ ಬಡ್ಡಿ, ಚಕ್ರಬಡ್ಡಿ ಸೇರಿ ಅಡಮಾನವಿಟ್ಟ ಭೂಮಿಯನ್ನು ಕಳೆದುಕೊಳ್ಳುವ ಪರಿಸ್ಥಿತಿ ಉಂಟಾಗುತ್ತದೆ ಎಂದು ಎಚ್ಚರಿಸಿದರು.

ಡಿಸಿಸಿ ಬ್ಯಾಂಕಿನ ಸಾಲದಲ್ಲಿ ಸರ್ಕಾರದ ಹಣವಿಲ್ಲ, ರೈತರ ಷೇರು ಮತ್ತು ಠೇವಣಿ ಹಣದಿಂದಲೇ ಸಾಲ ನೀಡಲಾಗುತ್ತಿದೆ ಎಂದು ರಾಜಣ್ಣ ಹೇಳಿದರು. ಈ ವರ್ಷದಿಂದ ನಬಾರ್ಡ್ ಮತ್ತು ಅಪೇಕ್ಸ್ ಬ್ಯಾಂಕಿನ ಸಾಲವನ್ನು ಕಡಿಮೆ ಮಾಡಿರುವುದರಿಂದ ಸೊಸೈಟಿಗಳು ಕೃಷಿಯೇತರ ಸಾಲಗಳನ್ನು ನೀಡಲು ಮುಂದಾಗಬೇಕು ಎಂದು ಸೂಚಿಸಿದರು. ಜಿಲ್ಲೆಯಲ್ಲಿ ಮೇವು ಬ್ಯಾಂಕ್, ಗೋಶಾಲೆ ತೆರೆದರೆ, ರೈತರಿಗೆ ಗುಣಮಟ್ಟದ ಮಧ್ಯಾಹ್ನದ ಊಟ ಒದಗಿಸಲು ಡಿಸಿಸಿ ಬ್ಯಾಂಕ್ ಸಿದ್ದವಿದೆ ಎಂದು ಘೋಷಿಸಿದರು. ರೈತನದ್ದು ನೀಡುವಕೆಯೇ ಹೊರತು ಬೇಡುವಕೆಯಲ್ಲ, ಆದರೆ ಪ್ರಕೃತಿ ಕೆಲವೊಮ್ಮೆ ಅವನನ್ನು ಅಸಹಾಯಕನನ್ನಾಗಿ ಮಾಡುತ್ತದೆ ಎಂದು ಹೇಳಿದರು.

ಕೇಂದ್ರ ಸರ್ಕಾರ 1964ರ ಸಹಕಾರಿ ಕಾಯ್ದೆಗೆ 2025ರಲ್ಲಿ ತಿದ್ದುಪಡಿ ಮಾಡಿ ಒಬ್ಬ ವ್ಯಕ್ತಿ 10 ವರ್ಷಗಳ ಕಾಲ ಮಾತ್ರ ಪದಾಧಿಕಾರಿಯಾಗಿ ಮುಂದುವರೆಯಬೇಕು ಎಂಬ ನಿಯಮ ತಂದಿರುವುದನ್ನು ವಿರೋಧಿಸಿ, ರೈತರ ಷೇರುಗಳಿಂದಲೇ ನಡೆಯುವ ಸಹಕಾರಿ ಬ್ಯಾಂಕುಗಳಿಗೆ ಇದು ಅನ್ವಯಿಸುವುದನ್ನು ಖಂಡಿಸಿದರು. ಈ ನಿರ್ಣಯವನ್ನು ಆರ್.ಬಿ.ಐಗೆ ಕಳುಹಿಸಲಾಗುವುದು ಎಂದು ತಿಳಿಸಿದರು. ಪ್ರಸ್ತುತ ವರ್ಷದಲ್ಲಿ ಡಿಸಿಸಿ ಬ್ಯಾಂಕು 146 ಕೋಟಿ ಷೇರು ಬಂಡವಾಳದೊಂದಿಗೆ 215 ಕೋಟಿ ಸಾಲ ಸೌಲಭ್ಯ ವಿತರಿಸಿದ್ದು, 25.60 ಕೋಟಿ ಒಟ್ಟು ಲಾಭ ಗಳಿಸಿದೆ. ವೆಚ್ಚ ಕಳೆದು 5.55 ಕೋಟಿ ನಿವ್ವಳ ಲಾಭ ಪಡೆದಿದೆ. ಎನ್.ಪಿ.ಎ ಶೇ.2.96 ಇದ್ದು, ಶೇ.12.20 ಡಿವಿಡೆಂಡ್ ಷೇರುದಾರರಿಗೆ ನೀಡಲಾಗುತ್ತಿದೆ. ಮೃತರಾದ ಸಾಲಗಾರರ 25 ಸಾವಿರ ರೂ. ಸಾಲವನ್ನು ಮನ್ನಾ ಮಾಡಲಾಗುತ್ತಿದ್ದು, ಇದುವರೆಗೆ 50 ಕೋಟಿ ರೂ.ಗಳನ್ನು ಸಾಲಮನ್ನಾಕ್ಕೆ ಬಳಸಲಾಗಿದೆ ಎಂದು ಅಂಕಿ ಅಂಶಗಳ ಮೂಲಕ ವಿವರಿಸಿದರು.

ಸಭೆಯಲ್ಲಿ ಡಿಸಿಸಿ ಬ್ಯಾಂಕ್ ಉಪಾಧ್ಯಕ್ಷ ಜಿ.ಜೆ. ರಾಜಣ್ಣ, ಎಂ.ಎಲ್.ಸಿ. ಆರ್. ರಾಜೇಂದ್ರ, ಶಾಸಕ ಕೆ. ಷಡಕ್ಷರಿ, ಬಿ. ಶಿವಣ್ಣ, ಎಸ್. ಲಕ್ಷ್ಮಿನಾರಾಯಣ, ಎಸ್. ಹನುಮಾನ್, ಜಿ.ಎಸ್. ರವಿ, ಎಸ್.ಆರ್. ರಾಜಕುಮಾರ್, ಎಂ. ಸಿದ್ದಲಿಂಗಪ್ಪ, ಪ್ರಭಾಕರ್, ಬಿ. ನಾಗೇಶಬಾಬು, ಮಾಲತಿ, ಆರ್. ರವಿಕುಮಾರ್, ಪಿ.ಆರ್. ನಾರಾಯಣಗೌಡ, ಸಿಇಓ ಜಂಗಮಪ್ಪ, ಸಲಹೆಗಾರ ರಮಣರೆಡ್ಡಿ, ಸಹಕಾರ ಇಲಾಖೆ ಉಪನಿಬಂಧಕರಾದ ಚಂದ್ರಶೇಖರ್, ಚಂದ್ರಗಿರಿ ಲಕ್ಷ್ಮಿನಾರಾಯಣ, ಕುಂಭಣ್ಣ, ಟಿ.ಪಿ. ಮಂಜುನಾಥ್, ನಬಾರ್ಡ್ ಅಧಿಕಾರಿ ಮೋಹನ್ ಸಾಯಿ ಗಣೇಶ್, ಗಣಕಯಂತ್ರ ವಿಭಾಗದ ಮಹಾಪ್ರಭಂಧಕ ಎಸ್. ಶ್ರೀಧರ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.